مختصر تذکرہ شاعرِ پوٹھوہار باقی صدیقی (وصال 8 جنوری 1972ء) تحریر: ماجد حسین ہاشمی مہروی

نام و نسب:
باقی صدیقی 20 دسمبر 1908ء کو راولپنڈی کے نواحی علاقہ سہام کے مذہبی اور جاگیردار گھرانے میں پیدا ہوئے، آپ کا پیدائشی نام محمد افضل اور والد کا نام میاں احمد جی تھا، جو نارتھ ویسٹ سٹیٹ ریلوے میں ملازم تھے۔ سہام اس وقت متحدہ ہندوستان کا حصہ تھا، اب راولپنڈی شہر کے اندرون ایک گنجان آباد علاقہ ہے۔ سہام انگریزی عمل دخل ، ایسٹ انڈیا کمپنی یہاں تک کہ مغلیہ سلطنت کے ہندوستان میں قدم جمانے سے قبل کا آباد ہے۔ سہام گاؤں باقی صدیقی کے ہی بزرگوں نے بہت پہلے اپنی علاقائی و شخصی نسبت”سہام” کے نام پر آباد کیا تھا۔ سہام کی نسبت خاندان قریش ہاشمی علوی سہامی سے ہے، یعنی قریش قبیلہ سے ہاشمی خاندان، اور ہاشمی سے اولاد علی اور اولادِ علی سے ایک معروف بزرگ شیخ سہام الدین کی علاقائی و شخصی نسبت سے “سہام” ہے۔

قلمی نام:
ادبی دنیا میں آپ نے کہیں تخلص اختیار کیے، شروع میں پوٹھوہاری اور پنجابی بیتوں سے آغاز کیا اور “افضل سہامی” قلمی نام اختیار کیا، بعد ازاں “خاور”، “ناوک” اور “فانی”کو اختیار کیا، لیکن آپ مطمئن نہ ہوئے بالآخر آپ نے غور و فکر اور تحقیق کے بات “باقی” کا تخلص اختیار کیا۔ ویسے تو غزلیہ شاعری میں انہوں نے تخلص باقی کو ہی رکھا لیکن ادبی دنیا ، ریڈیو اور ٹیلی ویژن میں “باقی صدیقی” کے قلمی نام سے معروف ہوئے۔ باقی صدیقی ویسے تو قریش قبیلہ کی شاخ، بنوہاشم اور بنوہاشم سے اولاد علی میں سے تھے، لیکن قلمی نام میں “صدیقی” لاحقہ کی وجہ اُن کی ذاتی طور امیر المومنین، خلیفہ اول حضرت سیدنا ابوبکر صدیق رضی اللہ عنہ سے عقیدت و محبت تھی۔ صدیقی لاحقہ کے متعلق اُن کے اہل خانہ، خاندان، قریبی عزیز نجمی صدیقی اور دوستوں باسط سلیم، قمر رعینی و دیگر علم و ادب سے تعلق رکھنے والے حضرات نے کتب، جرائد اور مقالات میں عام ذکر کیا ہے۔ دراصل آپ کے والد مکرم آپ کی نوعمری میں ہی وصال فرما گئے، جس کی وجہ سے آپ کی تربیت اور پرورش آپ کے نانا نے کی، جن کے ہاں حضرت سیدنا ابوبکر صدیق رضی اللہ عنہ کے ادب، احترام اور آقا کریم ﷺ سے مودت کے تذکار اکثر رہتے، اسی ماحول نے آپ کے دل میں بھی سیدنا ابوبکر کی محبت و عقیدت میں اضافہ کیا، یہاں تک کہ آپ نے اس کو اپنے تخلص کے ساتھ لاحقہ کے طور شامل کر کے “باقی صدیقی” ہی قلمی نام اختیار کر لیا۔

تعلیم و تربیت:
آپ مذہبی اور علمی خانوادے سے تعلق رکھتے تھے اس لیے خاندانی طریق کے مطابق سب سے پہلے مدرسہ سے قرآن پڑھا اور عربی کی ابتدائی تعلیم حاصل کی۔ ڈینیز ہائی سکول سے میٹرک کا امتحان پاس کیا۔ اس دور میں آپ کو سہام کے پہلے میٹرک پاس فرد ہونے کا اعزاز بھی حاصل ہوا۔ ویسے تو آپ مزید تعلیم کے خواہشمند تھے لیکن والد کی وصال اور گھریلو حالات کی وجہ سے میٹرک کے بعد معلمی پیشہ وارانہ کورس کیا۔
سہام میں گاؤں کے مرکزمیں بوڑھ کے درخت کے نیچے چاندنی راتوں میں محافل جما کرتی تھی، جس میں سائیں فقیر، ماسٹر نور محمد، میاں محمد گلستان، شیر خان و دیگر اُردو اور پنجابی میں طبع آزمائی کرتے، ایسے ماحول میں باقی صدیقی جیسا ایک عظیم شاعر ابھر کر پورے ہندوستان میں معروف ہوا۔ آپ نے شاعری کا آغاز کیا ، عبدالحمید عدم سے تعلق استوار ہونے پر انہی سے مشورہ سخن کیا۔ شاعری میں اصلاح کے حوالے عبدالعزیز فطرت اور غلام نبی کامل سے رہنمائی لی۔

پیشہ اور خدمات:
باقی صدیقی نے سب سے پہلے معلمی کے پیشہ کو اختیار کیا اور بطور اُستاد خدمات سرانجام دیں۔ تقریبا 1932ء میں آپ نے معلمی کے پیشہ کو خیر آباد کر کے ممبئی کا سفر کیا اور فلم انڈسٹری میں بطور اداکار کام کیا، جنگی موضوع پر بنی فلم “توپ کا بچہ” میں کوتوال کا کردار ادا کیا۔ فلم انڈسٹری میں کام کے ساتھ آپ نے امپیرئیل فلم کمپنی میں ملازمت اختیار کر لی، فلم “مرد کا بچہ” کے لیے گیت بھی لکھے اور بطور مکالمہ نگار کام بھی کیا۔1940ء دوسری جنگ عظیم میں برطانوی فوج میں بطور کلریکل سٹاف بھرتی ہوئے اور 1943ء میں آرڈیننس ڈپو میں ٹرانسفر ہو گئے اور 1945 تا 1949ء تک ایم ای ایس میں خدمات سر انجام دیتے رہے۔ بعد ازاں آپ نےمحسوس کیا کہ میں فوج کی نوکری کا مزاج نہیں رکھتا، لہذا استعفی دے کر اپنے آبائی مقام سہام آگئے۔ 1950ء سے 1952ء تک محمد ایوب محسن کے پرچے “راہ منزل” سے منسلک رہے اور ساتھ ہی یکم ستمبر 1950ء کو ریڈیو پاکستان راولپنڈی کا آغاز ہوا اور آپ اس سے بھی وابستہ ہوگئے۔ یوں باقی صدیقی، سید تصدق اعجاز، اختر امام رضوی اور سید اختر جعفری جیسی قدآور شخصیات نے مل کر ریڈیوپاکستان کے راولپنڈی اسٹیشن کو پروان چڑھایا۔ پنڈی دیس اور جمہورنی واز اس زمانے کے بہترین اور معروف پروگرام ہوئے، جو کہیں دہائیاں چلتے رہے۔ آپ نے بطور شاعر، ادیب، ڈرامہ نگار، فیچررائٹر، اور صحافی کے خدمات سرانجام دیں اور ہندوستان کے معروف ادبی حضرات میں شمار ہوا۔ عمر کے آخری حصہ میں آپ صحافت سے بھی منسلک رہے ۔ آپ کی شہرت میں اس وقت مزید چار چاند لگا جب مایہ ناز گلوکارہ اقبال بانو نے آپ کی شہرہ آفاق غزل” داغ دل ہم کو یاد آنے لگے” گائی اوریوں شہرت دنیا بھر کے اردو شاعری کے چاہنے والوں میں پھیل گئی۔

تصانیف:
* جام جم (نظمیں اور غزلیں، اشاعت 1944ء)
* دار و رسن( اشاعت 1951ء)
* زخم بہار(اشاعت 1961ء)
* کچے گھڑے (پوٹھوہاری / ہندکو شاعری، اشاعت 1967ء)
* کتنی دیر چراغ جلا (اشاعت 1977ء)
* زاد راہ (اشاعت 1984ء)
* کلیات باقی صدیقی (مرتبہ:ڈاکٹر فہیم شناس کاظمی)

کلام:
نمونہ اُردو کلام:
تم زمانے کی راہ سے آئے
ورنہ سیدھا تھا راستہ دل کا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
دیوانہ اپنے آپ سے تھا بے خبر تو کیا
کانٹوں میں ایک راہ بنا کر چلا گیا
باقیؔ ابھی یہ کون تھا موجِ صبا کے ساتھ
صحرا میں اک درخت لگا کر چلا گیا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
داغ دل ہم کو یاد آنے لگے
لوگ اپنے دیے جلانے لگے
کچھ نہ پا کر بھی مطمئن ہیں ہم
عشق میں ہاتھ کیا خزانے لگے
یہی رستہ ہے اب یہی منزل ہے
اب یہیں دل کسی بہانے لگے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
آپ کو کارواں سے کیا مطلب
آپ تو میر کارواں ٹھہرے
کچھ تو کج رو جہاں ہیں باقیؔ
کچھ ہم بھی قصہ خواں ٹھہرے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
چیں بہ جبیں ہو
کتنے حسیں ہو
اتنی خموشی
گویا نہیں ہو
وہ مہرباں ہیں
کیونکر یقیں ہو
دنیا سے کھیلو
ناز آفریں ہو
یہ بے حجابی
پردہ نشیں ہو
جیسا سنا تھا
ویسے نہیں ہو
سوچو تو باقیؔ
سب کچھ تمہیں ہو
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
آستیں میں سانپ اک پلتا رہا
ہم یہ سمجھے حادثہ ٹلتا رہا
آپ تو اک بات کہہ کر چل دیے
رات بھر بستر مرا جلتا رہا
ایک غم سے کتنے غم پیدا ہوئے
دل ہمارا پھولتا پھلتا رہا
زندگی کی آس بھی کیا آس ہے
موج دریا پر دیا جلتا رہا
اک نظر تنکا بنی کچھ اس طرح
دیر تک آنکھیں کوئی ملتا رہا
یہ نشاں کیسے ہیں باقیؔ دیکھنا
کون دل کی راکھ پر چلتا رہا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ان خشک وادیوں سے کوئی آشنا نہ تھا
باقی ہے میرے نام سے شہرت سہام کی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
باقی جو چپ رہو گے تو اٹھیں گی انگلیاں
ہے بولنا بھی رسم جہاں بولتے رہو
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
باقیؔ تری نگاہ کی دیوار بن گیا
چہروں کا مرحلہ کہ نقابوں کا سلسلہ
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
نمونہ پنجابی/پوٹھوہاری کلام:

ناں اوہ پینگاں ناں اوہ جھوٹے
ناں اوہ گھمرے گھمرے بوٹے
ناں اوہ گوڑھی چھاں، ایہ نیں میرا گراں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
میں ٹانڈا، تُوں ساوی چھَلّی
چار دیہاڑے قسمت رَلّی
فر اس دنیا دے جھمیلیاں وِچ
میں وی اکلّا، تُوں وی اکلّی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بدل آن تے جھکڑ جھلن
چیرے اُڈن صافے کھلن
تکاں، تک نہ سکاں
باری وچ بیٹھا کے تکاں
گلی گلی نی اڈنی مٹی
پھکاں، پھک نہ سکاں
باری وچ بیٹھا تکاں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اُچیاں کنداں
ڈک نا سکن
پھلاں نی خشبو
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
کوڈی اِک ارکان
رنگ برنگے روپ بدل کہ
کھیڈن سب انسان
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
وفات :
باقی صدیقی کے اندر حُبِ وطنی کا جذبہ شدید تھا، دسمبر 1971ء میں پاکستان دوٹکڑے ہوا اور بنگلہ دیش معرض وجود میں آیا۔ باقی صدیقی کے لیے یہ صدمہ ناقابل برداشت ثابت ہوا اور اسی غم کے باعث اپنی زندگی کی بازی ہار گئے۔آپ کا انتقال ان کے آبائی قصبہ سہام میں8 جنوری 1972ء کو ہوا، اور ان کو آبائی قبرستان نزد جامع مسجد الغفار میں سپرد خاک کیا گیا۔ ان کی لوحِ مزار پر درج ذیل اشعار درج ہیں:

دیوانہ اپنے آپ سے تھا بے خبر تو کیا
کانٹوں میں ایک راہ بنا کر چلا گیا
باقی ابھی یہ کون تھا موج صبا کے ساتھ
صحرا میں اک درخت لگا کر چلا گیا

*****ختم شد*******