0092-313-5000-734
مکمل پاکستان پارٹی کے بینرز اتارے جانے کے واقعے پر چیئرمین مکمل پاکستان پارٹی نے اپنا مؤقف واضح کرتے ہوئے کہا ہے کہ ہماری جماعت شروع دن سے غیر روایتی سیاست پر یقین رکھتی ہے اور آئندہ بھی اسی راستے پر چلتی رہے گی۔
انہوں نے کہا کہ پاکستان میں روایتی سیاست دہائیوں سے الزام تراشی، باہمی جھگڑوں، ایک دوسرے کے بینر اتارنے، سخت زبان اور نفرت پر مبنی رویّوں تک محدود رہی ہے، جس کا نقصان صرف ملک اور عوام کو ہوا ہے۔ اب وقت آ گیا ہے کہ اس طرزِ سیاست کو ترک کیا جائے۔
چیئرمین مکمل پاکستان پارٹی کا کہنا تھا کہ پاکستان کو آگے لے جانے کے لیے ہم آہنگی، برداشت اور مثبت مقابلے کی ضرورت ہے۔ اگر ہم ایک دوسرے کو نقصان پہنچانے، بدنام کرنے یا بلا وجہ مخالفت کرنے میں لگے رہے تو ملک ترقی نہیں کر سکتا۔ مخالفت ضرور کی جائے، لیکن پالیسیوں پر، دلائل کے ساتھ اور مہذب انداز میں۔
انہوں نے بینرز اتارنے کے عمل کی سخت الفاظ میں مذمت کرتے ہوئے کہا کہ اس طرح کے اقدامات نہ صرف غیر جمہوری ہیں بلکہ معاشرے میں مزید تقسیم پیدا کرتے ہیں۔ ہم اپنے دوستوں اور مخالفین سب سے گزارش کرتے ہیں کہ ایسے کاموں سے اجتناب کریں۔
چیئرمین نے مزید کہا کہ مکمل پاکستان پارٹی نفرت نہیں، دعوت کی سیاست پر یقین رکھتی ہے۔ جو لوگ ہماری مخالفت کر رہے ہیں، حتیٰ کہ وہ افراد جنہوں نے ہمارے بینرز اتارے، ہم انہیں بھی دل سے مکمل پاکستان پارٹی میں شمولیت کی دعوت دیتے ہیں۔ ہماری سیاست کا دروازہ سب کے لیے کھلا ہے، کیونکہ ہمارا مقصد افراد سے لڑنا نہیں بلکہ پاکستان کو جوڑنا اور آگے بڑھانا ہے۔
مکمل پاکستان پارٹی اس عزم کا اعادہ کرتی ہے کہ ہم ایسی سیاست کبھی نہیں کریں گے جو انتشار پھیلائے، اتحاد کو کمزور کرے یا معاشرے میں نفرت کو فروغ دے۔ پاکستان کا مستقبل صرف مثبت، غیر روایتی اور تعمیری سیاست سے ہی محفوظ بنایا جا سکتا ہے۔
